Желтоқсан тақырыбына арналған әңгімелерде желтоқсан оқиғасының бейнеленуі

Жобада М.Байғұтұлының желтоқсан тақырыбына арналған «Жоғалған жұрнақ» әңгімесінің поэтикалық ерекшеліктері талданады. Еліміз тәуелсіздік алғасын, өткенімізге көз жіберу мақсатында бұрын айтуға тыйым салынған «жабық» тақырыптардың бірі - Желтоқсан көтерілісі. Қазақтың қылшылдаған қыз-жігіттерінің көз жасынан тұратын бұл тақырыпты біраз қаламгерлер өз шығармаларына арқау еткені белгілі. Желтоқсан ызғарын да тұңғыш аңғарған жазушылардың бірі – Мархабат Байғұтұлы. Ол іс-әрекеті, мінез-құлқы өзгеше кейіпкерлердің бейнесін сомдауға талпынды. Осы талданып отырған әңгіме тақырыбы қазақ халқы үшін ел Тәуелсіздігінің бастаулары болған желтоқсан тақырыбының өзектілігі, саяси-әлеуметтік дискурсының көкейтестілігі, идеялық-эстетикалық жүгінің зәрулігімен ғана емес, шығарма композициясында қолданылған әдіс-тәсілдердің молдығында, шығарма жанрымен үйлесім, үндестігі мен жарасымдылығы жайында әңгіме етуге тұрарлық жаңалығымен бағалы.