Әйелдердің құқығы : Ауғанстандағы жағдайдың өзектілігі

Қазіргі таңда Ауғанстандағы әйелдердің құқықтары айтарлықтай шектеліп, дерлік нөлдік деңгейге төмендеді деуге толық негіз бар. Елде Талибан билікке келгелі бері әйелдердің азаматтық және әлеуметтік бостандықтары жылдан-жылға шектеліп, жағдай ушығып бара жатыр. Соңғы жаңалықтарға сүйенсек, оларға тіпті қоғамдық орындарда дауыстап сөйлесуге де тыйым салынған. Бастапқыда тек сырт келбет пен киім үлгісіне қатысты талаптардан басталған бұл шектеулер уақыт өте келе тым шектен шығып кетті. 2021 жылдың тамыз айынан бастап қыздарға тек 6-сыныпқа дейін ғана оқуға рұқсат беретін шешім қабылданып, білім алу құқығы кесілді. Бұл шектеудің салдарынан білімге ұмтылған кейбір бойжеткендер өздерінің жақындарынан, тіпті әкелері мен ағаларынан оқу құралдарын жасырып, подвалдарда ұйымдастырылған құпия мектептерге баруға мәжбүр болып отыр. Оған қоса, әйелдерді зорлық-зомбылықтан қорғайтын заңнамалық нормалар да өз күшін жойды. Бұл жағдай қыз баласының қоғамдағы орны мен рөлін тек ұрпақ өрбітуші құрал дәрежесіне дейін төмендетеді. Алайда, әрбір қыз баласы -өзіндік көзқарасы, арман-мақсаты бар жеке жан және дербес тұлға. Білім алу, даму және өз пікірін білдіру - кез келген адамның ажырамас табиғи құқығы. Әйелдерді бұл құқықтардан айыру тұлғаның толыққанды дамуын бұғаттап қана қоймай, бүкіл қоғамның болашағына орасан зор зиян келтіреді, сондықтан бұл мәселе әлем жұртшылығының назарын аудармай қоймайды.