Әл-Фараби атындағы ҚазҰУ цифрлық технологиялар мен робототехника саласында ілгерілеудің жаңа кезеңі

Жоғары білім беру саласында бәсекелестік күннен-күнге күшейіп, білім ұйымдарының стратегиялық дамуына жаңа талаптар қойылып отыр. Қазіргі цифрлық дәуірде оқу орнының имиджі тек академиялық көрсеткіштермен емес, технологиялық мүмкіндіктерімен, инновациялық әлеуетімен және цифрлық инфрақұрылымының деңгейімен бағаланады. Осы тұрғыдан алғанда жасанды интеллект технологияларын енгізу білім беру ұйымдарының бәсекелік қабілетін арттыруда маңызды құралға айналуда. ЖИ тек оқу процесін тиімді ұйымдастыруға мүмкіндік беріп қана қоймай, университеттің инновациялық бейнесін қалыптастырып, оның білім нарығындағы тартымдылығын арттырады.

Қазақстанның жетекші университеті — Әл-Фараби атындағы Қазақ ұлттық университеті (ҚазҰУ) мен Қытайдың ірі жоғары технологиялық компаниясы Jiangsu Huibo Robotics Technology Co., Ltd арасындағы серіктестік жаңа даму сатысына көтерілді. Бұл ынтымақтастықтың маңызды қадамы ретінде Қасым-Жомарт Тоқаевтың Қытайға ресми сапары барысында ҚазҰУ базасында «Цифрлық технологиялар және робототехника» халықаралық институты мен робототехника орталығының ашылуы өтті. Бұл оқиға Қазақстан мен Қытай арасындағы ғылыми-техникалық байланыстарды нығайтып қана қоймай, еліміздің цифрлық трансформациясына тың серпін береді.