Авторлық материал жариялағаныңыз
туралы сертификатты тегін алу үшін
+
Материал жариялау
БАҚ (СМИ) жариялаған соң номер беріліп қорғалады
Сертификатты (құжатты) тексеру

Қанағатсыз жандар...
Материал жайлы қысқаша түсінік: Қанағатсыз жандар туралы
Материалды ашып қарау
Қасиет Бахкерейқызы

Мақала

Қанағатсыз жандар

Осы бір алдамшы дүниеде адамдар неге тойымсыз екен? Қазіргі таңда қанағатсыздар қатары күрт көбеюде. Көбін айтып,тізе беру мүмкін емес,алайда дүниеқұмарлар,көрсеқызар жандар жетерлік. Тойымсыздық- өте жаман қасиет,ол ешқашан адамның атақ-абыройын көтермейді. Ондайлар армандарының жетегінде де кете алмас,бір сөзбен айтқанда,оң алмайды. Өмір бойы өзінің жиған-тергенін санап өткен адам бақытты ма,әлде күнделікті ғұмырындағы кішкене ғана шаттығына қуанған адам бақытты ма? Әлбетте,мен екіншісін жөн көремін. Өйткені,дүние-мүліктің артынан жүгіргендер бақыттың тәтті нәрін сезбей өтеді-ау. Бәлкім ақшалары,байлықтары жандарына біраз уақыт демеу болатын да шығар,дегенмен қазақта “Дүние деген – сордың суы,іше берсең,кептіре береді” деген мақал бар. Тойымсыз адамдар дүниені жинағанда,байлық қуғанда,ең алдымен,өздерін жоғалтып алатындарын ұмытатын сияқты. Бұл қылықтарының кесірлерінен өз болмыстарынан оп-оңай айырылады. Бірақ,мұны елеп жатқандары шамалы. Оларға айтарым: “Малыңа сүйенбе,арыңа сүйен”, “Жақсы – арына құл,жаман – малына құл”. “Сөз иесін табар” деген мақсатта айтылған ой. “Ал енді қанағаты жоқтар қайдан пайда болады?” деген сауалдың жауаптарын іздеп көрейін. Кез келген жан жарық дүние есігін ашқаннан кейін,өмір сүре бастағаннан соң,өзінше бақытты болғысы келеді. Бұл өмір заңын жоққа шығаруға болмайды. Бақыт – кез келген адамның ішкі тебіреніс пен толғанысқа толы ерекше бір сезімі. Бақытсыз ешкім де ғұмыр кешпейді-ау,сірә. Ол адамның рухани азығы,сарқылмас күші,маржандай асыл тасы. Көбі бақытты болудың сырларын іздеп,әуре-сарсаңға түседі. Алайда,бақыттың дәл жандарында екендігін көп түсіне бермейді. Бақыт – ол адамның денсаулығы,оның күнделікті жұмыстағы тірлігі,еш қайтарылмас бағалы уақыты,қастарындағы жақсы көретін жандары. Кейбіреулері бақытты ақша мен мал-мүлікте,мансап пен дүниеқұмарлықта деп ойлайды. Әрине,бұл жалған пікір. Мұның барлығы бүгін болса,ертең болмайды. Өткінші дүниелерді өмірдің мәні ету – бұл бос әурешілік. Алайда, “мал үшін қайғыратын адамдар” бар. Өзінде барды қанағат етпейтіндерді саусақпен санауға да келмейді. Пайымдауымша,осындай көңіл толмаушылық – бір адамның екінші адамнан артық болуын қалайтынынан туындайды. Мәселен,бір кісінің пәтері,жұмысы ,жалақысы,ата-анасы,бауырлары болады. Ал мұны байқап жүрген екінші кісі сол адамнан асып кетудің амалдарын қарастырады: үлкен,кең үйі,табысы мол қызметі,тиімді еңбекақысы,ата-анасының және бауырларының өзіне деген махаббатты молынан сыйлауын қалай бастайды. “Неліктен мен ол адамнан кеммін?”, “Сонда менің әл-ауқатым жетпегені ме?”, “Оның менен қандай артықшылықтары бар?” сынды сұрақтар туады. Міне,осындай сауалдардың шешімін таппай,әлек болады. Нысапсыздық, қанағатсыздық қасиеттері осылайша туындайды. Олардан түбегейлі арылу үшін әрбір адам өзімен-өзі жұмыс жасауы маңызды. Біреудің тапқан дүниесіне қызығудың қажеті жоқ,қайта еңбекпен келген табысқа қанағат ете білу керек. “Қанағат қарын тойғызады” деп бекерден-бекер айтпаған. Мұның мән-мағынасына терең үңіле алатын жан бақытты. Айтарым: “Бақытты болуды сырттан емес,өз жүрегіңнен таба біл”. Сонда ғана өзгелерге қатысты толассыз сұрақтардың шырмауынан босап шығуға таптырмас мүмкіндік бар. Сол бір мүмкіндікті қалт жібермеуге тырысайық!

Материалды жүктеу (Скачать)
Авторы:
Қасиет Бахкерейқызы
Жарияланған уақыты:
2019-12-14
Категория:
Әлеуметтану
Бағыты:
Барлығы
Сыныбы:
Барлығы
Тіркеу нөмері:
№ C-1576340638