Сын есімді оқытуға арналған танымдық жаттығулар жүйесі

Қазiргi кезеңде «тiл мен этнос» мәселесiне қатысты тiл бiлiмiндегi көптеген ғылыми еңбектер ұлттық сипатты, ұлттық танымды, ұлттық рухты тануға, танытуға негiзделген. Дегенмен халық танымының тілдік дерегi таным тұрғысынан әлi де болса қарастыруды қажет етеді. Осыған орай сын есімді танымдық тұрғыдан оқыта отырып, ұлттық құндылықтардың айқын үлгiлерi, соның iшiнде түр-түстiк аталымдар болмысын когнитивті-семантикалық талдау арқылы ашуды және оны оқыту мәселесімен байланыстыруды қажет деп ойлаймыз. Өмірдегі заттардың я құбылыстардың әртүрлі белгі, сапалық қаситеттері соны білдіретін ұғымдардың дамуы, жетілуі негізінде анықтала түседі. Бұлар ішкі сапалық жағынан да, тұрпат-тұлғалық жағынан да өзгеріске түсіп, бір ұғымның атауы ретінде жұмсалады. Тіл тұтынушы затты, құбылысты қалай түсінетіні көрініс беріп, ол таңба арқылы бейнеленеді. Сөйтіп, санада қалыптасып жетілген бейне тіл арқылы көрініс табады . Яғни тіліміздегі қалыптасқан сын аталымдары атауыштық (номинативтік) қызметпен қоса, танымдық қызметті де атқарады.