Тақырыбы: «Ұлттық патриотизмді оқушы бойына қалыптастыру»

Қай мемлекеттің де негізгі тірегі-асқақтаған күмбездер де, ғимараттар да, экономикалық жағдайда да емес, білімді де білікті, іскер де белсенді адамдар. Біздің балаларымыз білімі жоғары жұмысшылар мен фермерлер, инженерлер, банкирлер және өнер қайраткерлері, мұғалімдер мен дәрігерлер, зауыттар мен биржалардың иесі болады. Әрине, «Келешектің иесі-жастар», «Жастар өзінің ата-анасынан гөрі заманына көбірек ұқсас келеді». Сондықтан қоғам талабына сай, сол қоғамды көркейтетін, дамытатын жастар тәрбиелеу ең маңызды мәселе екені даусыз. Жаңа білімнің тізгінін ұстайтын еркін елдің ертеңгі шығармашылық кемеңгерлерін тәрбиелеу бесіктен, ұдайы үздіксіз даму барысында ғана қалыптасатыны белгілі. Бала бойындағы тәрбиенің бастауын ата-ана қалыптастырса, мектептегі тәрбие көзін жеткізуші, әрине, тәрбиешісі мұғалім болып табылады. Ұрпаққа беріліп жатқан адамгершілік дене, экономикалық, экологиялық, ақыл-ой тәрбиесімен қатар ұлттық патриоттық тәрбие ерекше орын алады. «Мен келешектің иесімін» деген ұрпақтың бойында білім, білік, адамгершілік, ар-намыспен қатар Отанды сүюге деген қасиеттер болады. Баланың өз отанын сүю немесе оған түсінбеушілікпен қарауы оның ес білгелі көрген тәрбисіне байланысты. Қазақ халқы ата-бабамыздың ұлы байтақ жерін тұмсықтыға шоқыттырмай, қанаттыға қақтырмай ұстап ұрпаққа аман-сау жеткізуінің өзі, бесіктегі нәрестенің адамгершілікке ғана тәрбиелемей Отан сүйгіштікке, елін, жерін қорғауға тәрбиелеуінің негізгі дәлелі.