НАНОТЕХНОЛОГИЯ ЖӘНЕ БАСҚАРУ ПСИХОЛОГИЯСЫ: БОЛАШАҚ МАМАН РЕТІНДЕ ҚАЛЫПТАСУ ЖОЛЫМ

Мен төрт жыл бойы әл-Фараби атындағы Қазақ ұлттық университетінде бакалавр дәрежесінде білім алдым. Мамандығым – “Инженер-техник және технолог”, нақтырақ айтқанда химия саласының нанотехнология және наноматериалдар бағыты. Бұл мамандықты қызыл дипломмен үздік бітірдім. Алайда Қазақстанда нанотехнология саласы енді дамып келе жатқандықтан, осы бағыт бойынша жұмыс істеу мүмкіндіктері негізінен жоғары оқу орындарында сабақ берумен ғана шектелетінін түсіндім. Ал мемлекеттік талаптарға сәйкес ЖОО-да оқытушы болу үшін міндетті түрде педагогикалық білім қажет. Осы себепті магистратурада педагогикалық бағытта оқу керек деп шешім қабылдадым. 2024 жылы бакалаврды аяқтаған соң, қыс айында КТ тапсырып, нанотехнология мамандығы бойынша педагогикалық магистратураға оқуға түстім. Таңдаған университетім – мен үшін ерекше ыстық, ұстаздары білімді, бағыт-бағдар беріп, алға жетелейтін әл-Фараби атындағы Қазақ ұлттық университеті. Бұл таңдауым үшін ешқашан өкінбеймін, себебі дәл осы орта мені мақсаттарыма жетелейді. Менің басты мақсатым – болашақта Қазақстанда нанотехнология саласын кеңінен дамытуға үлес қосу. Қазіргі таңда елімізде бұл мамандық терең оқытылатын оқу орындары өте аз: Алматыдағы әл-Фараби атындағы ҚазҰУ және Астанадағы Назарбаев университеті ғана. Басқа университеттерде бұл бағыт жеке мамандық ретінде ашылмаған, тек кей пәндердің шеңберінде жанама тақырып ретінде ғана қарастырылады. Сол себепті нанотехнологияны еліміздің өзге ЖОО-ларында да кеңінен оқытылып, болашақ мамандар ел экономикасы мен экологиясына пайда әкелетін деңгейде дайындалса екен деген ниеттемін. Бакалаврда нанотехнологияны оқи бастағанға дейін мен миллиардтан да кіші өлшемдегі материалдар әлемді өзгертіп жатыр дегенге сенбейтінмін. «Көзге көрінбейтін кішкентай бөлшектер қалайша үлкен пайда әкелуі мүмкін?» деген ой мазалайтын. Қателескен екенмін. Университетте білім ала отырып, наноматериалдардың көмегімен телефондар, олардың батареялары, күн панельдері, дәрі-дәрмектер, композитті материалдар, суперконденсаторлар және көптеген басқа да маңызды өнімдерді жасауға болатынын білдім. Бұл салаға деген қызығушылығым одан әрі артты.