Тұрақты электр ток көздері

Еркін зарядталған бөлшектердің реттелген немесе бағытталған қозғалысын электр тогы деп атайды. Электр тогының бағытына оң зарядталған бөлшектердің қозғалыс бағыты алынған. Электр өрісінің әсерінен өткізгіштерде пайда болатын электр тогын өткізгіштік ток деп атайды, ал зарядталған денені тұтастай көшіретін болсақ, онда бұл кезде пайда болатын токты конвекциялық ток деп атайды. Ортадан электр тогы өткенде келесі құбылыстар байқалады: 1. Электр тогы өткенде орта қызады (электр тогының жылулық әсері). 2. Электр тогы өткенде орта құрамды бөліктерге бөлінеді (электр тогының химиялық әсері). 3. Электр тогы өзін қоршаған ортада магнит өрісін тудырады (электр тогының магниттік әсері). Электр тогын сандық сипаттау үшін физикалық скаляр шама ток күші енгізілген. Ток күші деп - өткізгіштің көлденең қимасынан бірлік уақытта өтетін зарядты айтады.