Ашық сабақ: Нақты санның n-ші дәрежелі түбірі және оның қасиеттері. 11 сынып, Алгебра және анализ бастамалары.

11-сыныппен «Алгебра және анализ бастамалары» пәнінен «Нақты санның n-ші дәрежелі түбірі және оның қасиеттері» тақырыбы алдында «Алғашқы функция және интеграл» тарауын оқып аяқтадық. Сабағымның негізгі оқулық мақсаттары болып: оқушыларға санның n-ші дәрежелі түбірі және санның n-ші дәрежелі арифметикалық түбірі ұғымдарын таныстыру, n-ші дәрежелі түбірдің негізгі қасиеттерін меңгерту және оларды қолдана отырып өрнектерді түрлендіру білімдерін меңгерту болып табылды. Сабақ басында оқушыларды 1-ден 3-ке дейін санату арқылы 1ші, 2-ші, 2-ші топтарға бөліп отырғыздым. Әрбір топтар өздерінің көшбасшыларын таңдап белгілеулерін ұсындым. Жаңа сабақ кезеңдерін Блум таксономиясы тармақтарын қолданып өткіздім. Мәселен, «Білу» тармағында өтілген «Алғашқы функция және интеграл» тарауын пысықтауға бағытталған сұраулар жазылған кеспе қағаздарды әр топтарға үлестірдім. Топтар жылдам өздерінің сұрақтарына жауаптарын әзірлеп, жауаптарын айтуларын сұрадым. Ал, басқа топтардан жауапты «бағдаршам» әдісімен бағалауларын өтіндім. Әрбір үш топтың өз сұрақтарына жауаптарын тыңдап, басқа топтардың бағаларын және қосқан пікірлеріне талдау жасап өттік. Басқа топтар жауаптардың дұрыстығын, не қателігін өз ойларынша түзетулер жасады. Артынан өзім жауаптардың дұрыстығын, толықтығын саралап өттім. «Түсіну» тармағы кезеңінде, жаңа сабақ материалын топтаса меңгеру үшін тақырыпты үш бөлікке бөліп, әр бөлікті әр топтың оқушыларына түсіндіріп беруді тапсырдым.